الكماط مفيد لرضع

القناعة الشخصية والحقيقة العلمية !! اني جان عندي قناعة انه الكماط مفيد!(وكمطت بنتي 8 اشهر تقريبا وية الحبل بس مو قوي اشدهة ومتندمة الان) جان عندي قناعة انه لتشيل الطفل زايد يتعلم عالشيل (وهسة العلم اثبتلي انه يؤثر عالصحة النفسية بالمستقبل!!) جان عندي قناعة انه الانسان يولد عالفطرة وماكو شي عدا التربية والبيئة تاثر بتصرفاته وطبيعته!!وطلعت غلطانة ايضا بس بالحقيقة القراءة والتعلم والبحث وليس الدراسة (الاكاديمية) فقط اثبتتلي عكس ما جنت مقتنعة بي وماخذتة كمسلمات البارحة في احد الكروبات اخت تهجمت على منشور العادة السرية عند الاطفال لان هي مقتنعة انه هذا الشي موصحيح واني دا صفط حجي حتة اجمع لايكات!! ورة ماكتلهة انه هذا علم وموجود المصادر وحاورتها بكل ادب لان احترم غفلتها عن هذا الموضوع ودليتها وين تبحث كذا وكذا والدكتور الفلاني ايضا كتب عن الموضوع نزلتلهة الرابط ايضا بالاخير كالت ماعرف هاي قناعتي!! كتلها مو شرط قناعتك تعكس الحقيقة! الغرض من الموضوع انه مو معنى احنة مقتنعين بشيء معين هوهذا الصحيح كلش ممكن ناس تقتنع بالدجالين والعرافين وهمة غلط! وناس قناعته انه الثوم يوخر ابو صفار وناس قناعتها انه التربية بالضرب واكو وحدة جانت تحاول تقنعني انه الرضاعة الطبيعية غير جيدة للطفل والممة افضل وحليب القواطي احسن من حليب الام...(لا لشيء سوى انها ماكدرت ترضع اطفالها رضاعة طبيعية لان عدهة كومة اطفال وعيال وطلبات فانحرمت منها واقتنعت انه الممة افضل) وناس قناعتها انه احبس ابني وماطلعة وماخلي يختلط حتة محد يأذي.. هاي كلها قناعات واجتهادات شخصية لنخلط بينهة وبين الحقيقة ونعاملهة كمسلمات وحقائق يعني قبل فترة من الزمن الناس جانت مقتنعة انه الارض مسطحة!! وهسة الي يكول الارض مسطحة نضحك عليه!! (عدا نظرية الامؤامرة الله يستر عليهم ) ماعلينة من هذا الكلام .... المهم شنو عدكم قناعات جنتوا تعتبروهة مسلمات وهسة طلعت غلط؟؟ شاركونة